காந்தியார் இடத்தை நிறைவு செய்ய, இந்த நாட்டில் எவரும் இல்லை

 காந்தியார் இடத்தை நிறைவு செய்ய, இந்த நாட்டில் எவரும் இல்லை 

பெரியார் காந்தியவர்களின் விசனிக்கத்தக்க திடீர் மறைவு என்னைத் திடுக்கிட வைத்தது. இந்திய மக்கள் அனைவரையுமே இந்நிகழ்ச்சி திடுக்கிட வைத்திருக்குமென உறுதியாக நம்புகிறேன். கடந்த கால் நூற்றாண்டுகளுக்கு மேலாகவே, தோழர் காந்தியார் இப்பரந்த உபகண்ட மக்களின் எதிர்கால வாழ்வுக்கு வழிகாட்டியாயிருந்து வந்தார் மக்களுக்கு அவரது தொண்டு மகத்தானது. அவரது லட்சியக் கோட்பாடுகள் உலக மரியாதையினை ஏற்றுவிட்டன. 

காந்தியார் மீது நடத்தி இருக்கும் மோசமான தாக்குதல் கண்டனத்துக்குரியதாகும் பலதரப்பட்ட எல்லா வகுப்பு மக்களுக்கும் நியாயமாகவும், பாரபட்சமற்ற முறையிலும் நடந்து கொண்ட காந்தியார், இக்கொடுந்தாக்குதலுக்கு உள்ளாகி இருக்கிறார்கள் என்றால் இது மிகவும் வெறுக்கத்தக்கதாகும். இக்கொலையாளியை ஆட்டிப்படைக்கும் சதிகாரச் கூட்டம் ஒன்று திரைமறைவில் வேலை செய்து வரவேண்டும். வட இந்தியாவில் நடைபெற்று வரும் கலவரங்களுக்கெல்லாம் அடிப்படை காரணமாய் இருப்பது மதவெறியேயாகும். காந்தியாரின் இடத்தை நிறைவு செய்பவர் இந்நாட்டில் எவருமே இல்லை. மக்கள் தங்களது அரசியல், மதவேறுபாடுகளை மறந்து, சகோதர பாசத்துடன் நடந்து கொள்வதே நாம் காந்தியாருக்குச் செய்யும் மரியாதையாகும். தென்னாட்டுத் திராவிடர்கள் இயல்பாகவே நாட்டில் அமைதியும், சமாதானமும் நிலவ வைப்பர். 

(தோழர் காந்தியார் கொலையுண்ட செய்தி கேட்டு, திராவிடர் கழகத்தலைவர் பெரியார் ஈ.வெ. ராமசாமி அவர்கள் விடுத்த அறிக்கை )

-- குடிஅரசு - பெட்டிச் செய்தி - 07.02.1948